Aurreko asteburuan hasi zituzten txapelketak, bailarako lau eskubaloi taldek; eta beste hiru jarriko dira martxan, asteburu honetan: mutil seniorrena eta neska kadeteenak.
Gipuzkoako bigarren mailan ariko da Hernaniko mutil seniorren taldea, eta Pulporen kontra jokatuko du estreinakoa, gaur arratsaldeko 18:30etan hasita, kiroldegian. 10 talde izango dira guztira, eta 18 partidu jokatuko ditu bakoitzak.
Neska kadeteetan, berriz, talde bana izango dute Hernanik eta Mundarrok. Etxean ariko da talde astigartarra, Jaujaren kontra; bihar 11:00etan, kiroldegian. Hernanik, bere aldetik, Tolosan jokatuko du ligako aurrenekoa, gaur 16:00etan Usabalen, Tolosaren kontra.
Gaur jokatuko dute Hernaniko neska jubenilek ere: Leizaran izango dute kontrario, arratsaldeko 17:30etan hasita, Andoaingo kiroldegian. Mundarroko neska jubenilek atseden hartuko dute asteburu honetan.
Eta bihar daukate hitzordua, Hernaniko mutil kadeteek eta jubenilek. Etxean ariko dira bi taldeak: Bera Beraren kontra jokatuko dute kadeteek, goizeko 10:15etan hasita; eta Elgoibar hartuko dute jubenilek, eguerdiko 12:00etatik aurrera.