Mundarrok lortu du garaipena, denboraldiko aurreneko derbian, mutilen Gipuzkoako lehenengo mailan: 55-58 nagusitu zitzaion Hernaniri, larunbat arratsaldean, Hernaniko kiroldegian.
Oso berdindua izan zen partidua bigarren zatian, baina ez zen horrela izan hasieratik. Eta hain justu, aurreneko laurdenean lortutako abantaila aprobetxatu zuten astigartarrek, garaipena lortzeko. Izan ere, 10-20 aurreratu ziren lehenengo hamar minutuetan, Goyak lortutako 10 puntuei esker. Hernaniren aldetik, Berrondok sartu zituen taldearen 10 puntuak.
Jasotako kolpeari erantzuteko gai izan zen talde hernaniarra, eta bigarren laurdenean lortu zuen tartea lau puntura murriztea. Horrela, 26-30 iritsi ziren atsedenaldira.
Aldageletatik bueltan, parekatuagoa izan zen lehia, aurreneko zatiko gorabeherarik gabe.Beste puntu bat haunditu zuen tartea Mundarrok, eta bosteko aldearekin iritsi zen azkeneko laurdenera (42-47), baina dena zegoen erabakitzeko, oraindik.
Gogor saiatu ziren hernaniarrak partiduari buelta ematen, Nobleren 8 puntuekin eta Berrondoren 5 puntuekin. Eta lortu zuten tartea murriztea, baina ez zen nahikoa izan azkenean: hiru punturen aldea erakutsi zuen markagailuak bukaeran, astigartarren alde (55-58).
Berrondok lortu zituen puntu gehien Hernaniren aldetik, 23 guztira; eta 14 punturekin bukatu zuen Noblek. Mundarroren kasuan, berriz, Goya izan zen saskiratzaile onena, 22 punturekin; 11 punturekin bukatu zuen Agouesek, eta 10ekin Izagirrek.
Larunbat honetan jokatuko dute Mundarrok eta Hernanik, denboraldiko hirugarren partidua. Etxean jokatuko dute astigartarrek, 18:00etan hasita kiroldegian; eta Internacional talde donostiarra izango dute aurrean. Hernanik, berriz, Eibarren jokatuko du ligako hirugarrena, 16:30etan hasita Ipurua kiroldegian, Eibarren kontra.
Mundarroko neskek debuta, Zarautzen kontra
Nesketan, berriz, aste honetan hasiko du denboraldia Mundarrok, Gipuzkoako lehenengo mailan. Etxean jokatuko du estreinakoa, ostiralean: arratsaldeko 19:40etan hasita, Zarautz izango dute aurrean astigartarrek.
Bederatzi talde ariko dira Gipuzkoako lehenengo mailan, denboraldi honetan; Mundarro eta Zarautzekin batera, Goierri, Oiarso, Hoops, Take, Internacional, Easo eta Ostadar. 22 jardunaldi izango dira guztira, baina 16 partidu jokatuko ditu talde bakoitzak, eta beste sei jardunalditan hartuko du atseden. Mundarrok, aurreneko atsedena izango du bigarren jardunaldian, urriaren 17ko asteburuan. Urriaren 22an jokatuko du ligako bigarren partidua, berriro ere Astigarragako kiroldegian, 19:40etan hasita Takeren kontra.