Joan den uztailean sartu zen indarrean autobus zerbitzu publikoaren kontzesio berria. Horrekin, Urumea bailaran ere aldaketak izan ziren ordutegietan eta geltokietan. Gertatutakoaren aurrean, herritarrek murrizketak salatu eta kexak adierazi dituzte. Besteak beste, helarazi dute herritarrak eta garraio publikoa autobus zerbitzu berriaren «galtzaile» irten direla.
Aforoa beteta eta autobusak maiztasun gutxirekin
Lurraldebusek egindako aldaketen harira, bailarako herritar baten testigantza jaso du Kronikak: «lehen, goizeko 07:00etan hartzen nuen autobusa lanera joateko. Orain, berriz, aldaketak egon direnez, ez dut aukera hori eta 07:15etakoa hartu behar izaten dut. Hala ere, beteta joaten da eta, batzuetan, ezin dugu sartu ere egin. Beraz, berandu iristen naiz».
Laburbilduz, dio, «kaosa» izaten dela goizero-goizero: «jendea lanera, umeak eskolara... Ikasleek autobus gidariari sartzen uzteko eskatzen diote, eskolara joan behar dutelako. Baina lekurik ez dagoenez, ezezkoa ematen die eta hortxe gelditzen dira».