Porrotarekin hasi dute denboraldia Mundarrok eta Hernanik, mutilen Gipuzkoako lehenengo mailan. Eta bi taldeei, bigarren zatian egin zien ihes garaipenak, atsedenaldira berdinduta iritsi ondoren: 34-49 galdu zuen Mundarrok etxean, Atletico San Sebastianen kontra; eta 70-61 galdu zuen Hernanik ere, Donostiako Benta Berri kiroldegian, Añorgaren kontra.
Primeran ekin zioten partiduari astigartarrek, eta 6-0 aurreratu ziren markagailuan; baina buelta eman zion Atleticok, eta 12na bukatu zuten aurreneko laurdena. Parekatua izan zen bigarrena ere, donostiarrek lau punturen aldea lortu zuten arren, atsedenaldira aurretik iristeko (21-25). Baina aldageletatik bueltan hautsi zen partidua: astigartarrek apenas lortu zuten lau puntu sartzea, eta ihes egin zuen Atletico San Sebastianek, azkeneko laurdenaren faltan (25-36). Eta ahaleginak egin arren, Mundarrok ezin izan zuen garaipenaren lehian sartu berriro, azkeneko minutuetan.
Gehiago eutsi zien bere aukerei Hernanik, Añorgaren kontra; eta berdinduta iritsi ziren azkeneko laurdenera ere. 20-18 aurreratu ziren añorgarrak, aurreneko 10 minutuetan, baina buelta eman zion Hernanik, atsedenaldiaren aurretik, eta 38-39 aurretik zirela egin zuten aldageletarako bidea. Oso berdinduta jarraitu zuen partiduak, hirugarren laurdenean ere, eta bi punturen aldearekin iritsi ziren hernaniarrak, azkeneko 10 minutuetara (48-50). Baina orduan, gehiago izan zen Añorga, eta ezin izan zuen bere maila onena erakutsi Hernanik: 22-11ko partziala lortu zuten etxekoek, partidua irabazteko. Edonola ere, Hernaniko bi jokalari nabarmendu ziren, ligako estreinako partiduan: 25 puntu lortu zituen Ander Berrondok, eta 22 puntu Hodei Noblek.
Datorren asteburuan, derbia jokatuko dute Hernanik eta Mundarrok, ligako bigarren jardunaldian. Larunbatean izango da, arratsaldeko 16:00etan hasita, kiroldegian. Nesken Gipuzkoako 1go mailan, berriz, ostiralean hasiko du denboraldia Mundarrok: etxean ariko da, 19:40etan kiroldegian, eta Zarautz izango du aurrean.