Atzo goizean bildu zen LABI batzordea, Euskal Autonomia Erkidegoko osasun egoera aztertzeko; eta gaurtik aurrera, arindu egingo ditu Covid-19aren kontrako neurriak. Horrela, %75eko aforoa izango dute komertzioek, eta baita ostalaritza establezimenduek ere. Mahai bakoitzean, hori bai, gehienez 8 lagun izan daitezke barruan, eta 12 terrazan.
%75ekoa izango da aforoa, kirol eta kultur ekitaldietan ere, baina muga batzuekin: 3.000tik beherako aforoa duten eremuetan, ezingo dira sartu 1.500 baino gehiago barrualdean, eta 1.800 baino gehiago kanpoaldean; eta 3.000tik gorako aforoa dutenetan, %40koa izango da barruan, eta %60koa eremu irekietan.
Establezimenduetan zein ekitaldietan, goizaldeko 03:00etara zabalduko dute muga ordua.
Gaueko aisialdirako guneak ere jarri ahal izango dira martxan, %50eko aforoarekin. Ezingo da barran edo zutik kontsumitu, eta maskarilla jantzita eraman beharko da uneoro, baita dantzarako pistan ere.
Kirol instalazioetan, berriz, 16koak izan daitezke taldeak gehienez, eta aldageletan %50ekoa izango da aforoa.
Soziedadeetan, %75ekoa izango da aforoa aurrerantzean, baina ezingo da barran edo zutik kontsumitu, eta zortzi laguneko taldea elkartu daiteke mahai bakoitzean. Maskarilla derrigorrezkoa izango da, jan edo edateko unean izan ezik. Aireztatuta egon beharko dute uneoro.
Eta gazte lokalak irekitzeko baimena ere emango dute, 16-29 urte bitartekoen %85ak txertaketa osatzen duenean.