Datorren astean jasoko dute Covid-19aren aurkako txertoaren aurreneko dosia, 12 eta 16 urte bitarteko gazte aranoar eta goizuetarrek. Ostegunean izanen da hori, abuztuaren 12an, Irurtzunen; eta dagoeneko eskatu dezakete hitzordua.
Horretarako, lau modu dauzkate aukeran: interneten egin dezakete, Osasun Karpeta Pertsonalean sartuta; posta elektronikoz, citas.covid@navarra.es helbidera idatzita; 948 37 01 30 telefonora deituta; edota Nafarroako Osasun Sailaren SMSa jasotzean, bertan erantsiko dieten loturan sartuta.
Aranoko eta Goizuetako gazteek, Aresokoekin eta Leitzakoekin batera, Irurtzunen jasoko dute txertoa: datorren ostegunean aurreneko dosia, eta irailaren 2an bigarrena.