Beste bikote hernaniar batek lortu zuen semifinaletara sailkatzea, atzo, Zikuñaga Papelera Txapelketan: 18-16 irabazi zuten Manex Martin eta Oier Alegria kadeteek, Azkoitiko Aldazabalen eta Egañaren kontra, final laurdenetako partiduan.
Jubenilen bigarren mailan, berriz, Murumendiko Usabiaga eta Leunda nagusitu ziren, Oiarpeko Ubiriaren eta Aranbururen kontra (18-7). Eta nagusien bigarren mailan, Oiarpeko Etxabek eta Olaizek egin dute aurrera, Belokiko Vianari eta Agirreri irabazita (18-8).
Bailarako bi bikote, gaurko jaialdian
Final laurdenetako beste bi partidu jokatuko dira gaur, arratsaldeko 18:00etan hasita, Hernaniko kiroldegiko frontoian. Eta horietan, bailarako bi bikote ariko dira, semifinaletara sailkatu nahian. Aurrena, kadeteen bigarren mailan, Xuban Iturbe hernaniarrak eta Xuban Goñi astigartarrak jokatuko dute, Larraungo Txintxurretaren eta Sotilen kontra. Eta ondoren, jubenilen lehenengo mailan, Xabier Apaolaza eta Anartz Oiartzabal hernaniarrek jokatuko dute, Larraungo Iriartetarren kontra.