Gaur goizeko txupinazoarekin emango diete hasiera, Martindegiko San Ferminei, 10:00etan. Eta segidan, txistularien doinuei jarraituz, kalejira egingo dute, jaiei behar bezalako ongi etorria emateko, udalekuetako gaztetxoek girotuta, hain justu. Kalejiraz gain, gaur bertan meza eskainiko da auzoko hildakoen alde, 11:00etan.
Bihar eta etzi ekintzarik egingo ez bada ere, asteburu potentea dator Martindegin. Larunbatean, kantaldia antolatu da, eta bertan izango dira Elaia Diaz eta Malen Barrenetxea, Laiotz taldeko Itxaso Treku eta Manex Albira, Niko Etxart eta Andoni Ollokiegi.
Igandean, Baldin Bada kale ikuskizuna eskainiko du Shakti Olaizolak, eguerdian. Eta arratsaldean izango dira herri kirolak eta bertso jaialdia, jaiak kalejira batekin agurtu aurretik.