Ostegunean hasi zen Zikuñaga Papelera txapelketa, eta dagoeneko jokatu dira sei partidu. Ostegunean, 18-16 irabazi zuen Unax Arabaolaza hernaniarrak, Larraungo Sotilekin, Añorgako Arruti eta Pradaren kontra; eta 18-10 nagusitu ziren Manex Martin eta Oier Alegria, Añorgako Oliden eta Zazpi Iturriko Mujikaren kontra. Atzo, 12-18 galdu zuten Mattin Arluziagak eta Anartz Oiartzabalek, Tolosako Iraeta eta Intxurreko Uzkudunen kontra.
Gaurkoa du hirugarren eguna torneoak, Hernaniko frontoian. Bi partidu jokatuko dira goizean (11:00), eta horietako batean, Xuban Iturbe hernaniarra eta Xuban Goñi astigartarra ariko dira, Intzako Diaz de Gereñu eta Elosegiren kontra. Arratsaldean (16:30), berriz, hiru partidu izango dira, eta Josu Altuna eta Mikel Lasa hernaniarrek jokatuko dute, Alde Zaharrako Gabirondo eta Huegunen kontra.