Oso betea zeukaten asteburua, bailarako txirrindulariek, makina bat probarekin. Eta horietan garrantzitsuenean, afizionatuen Euskadiko Txapelketan, maila onean aritu ziren: bederatzigarren sailkatu zen Enekoitz Azparren astigartarra, 21garren Ander Amonarriz hernaniarra, eta 26garren Telmo Semperena astigartarra, igandean Ataunen. Onenak gertu izan zituen Azparrenek, eta 43 segundura iritsi zen, 23 urtez azpikoetan seigarren izateko. Amonarriz, elite mailakoetan izan zen seigarren.
Jubenilek, berriz, San Juan Saria zeukaten jokoan Seguran. Tarte haundiak izan ziren sailkapenean, eta 25garren helmugaratu zen Xabat Alonso hernaniarra, 4:21era. Mikel Goikoetxea herrikidea 45garren iritsi zen, minutu erdi beranduago.
Eta kadete mailakoek, azkenik, zita bikoitza izan dute asteburuan. Larunbatean, hasteko, Zumaiako Saria jokatu zuten, eta bertan izan zen Tasio Semperena astigartarra; baita ondo aritu ere: 8garren sailkatu zen. Bi txirrindularik hartu zioten aurrea 55 laguneko tropelari, eta hirugarren posturako esprintean, onenen artean helmugaratu zen Semperena.
Igandean, berriz, Gipuzkoako Erlojupeko Txapelketa izan zuten Bergaran, banaka. Eta bailarako bi ordezkari izan ziren bertan. Nesketan, zortzigarren sailkatu zen Intza Navarro hernaniarra, 7,2 kilometroko ibilbidea 13:54 denboran osatuta. Eta mutiletan, 33garren izan zen Tasio Semperena, 11:53 denborarekin.
Datorren asteburuan, jubenilak izango dira protagonista. Larunbatean, Idiazabal Saria jokatuko dute, bi zatitan: 48,5 kilometroko etapa aurrena, eta 4 kilometroko erlojupekoa ondoren. Eta igandean, Uzarraga Igoera jokatuko dute Antzuolan.
Afizionatu mailakoek, Gipuzkoako Erlojupeko Txapelketa jokatuko dute gaur zortzi