Asko daukate jokoan bailarako futbol taldeek, asteburuan. Gora begira daude batzuk, igoera lortu nahian; baina mailari eusteko lehian ari dira besteak.
Aurreneko kasua da Hernaniko mutil nagusiena, Ohorezko Erregional mailan. Igoera faseko finalera sailkatu nahi dute, eta horretarako, bihar daukate azkeneko pausoa: Eibarren jokatuko dute, talde armaginaren kontra, goizeko 11:30etan. Joanekoan Zubipen 2-0 irabazi ondoren, abantaila horri eutsi nahi diote berdeek, hirugarren mailara igoera are gertuago izateko.
Onenen artean ari da Mundarro ere, mutilen Erregional Preferenteetan; eta gaur hasiko du azkeneko fasea, final laurdenetan. Vasconiaren kontra jokatuko du, Donostiako Puio zelaian, arratsaldeko 18:00etan.
Bestelakoa da Hernanik daukan erronka, nesken Euskal Ligan. Mailari eusteko borrokan dago oraindik, bereziki aurreko asteburuan galdu ondoren. Bi partidu falta zaizkio jokatzeko, eta gutxienez horietako bat irabazi beharko du, mailari eustea ziurtatzeko. Gaur daukate aurreneko aukera, baina ez da xamurra izango: Alaves B izango dute aurrean, multzoko liderra dena; arratsaldeko 16:00etan hasita, Gasteizko Compañonen.
Eta Mundarroko 1go mailako erregionalek, azkenik, gaur daukate txapelketa faseko semifinala, 16:00etan Zarkumendegin.