Errioxan estreinatu du bere palmaresa Enekoitz Azparren astigartarrak, afizionatu mailan: Agoncilloko Klasika irabazi zuen igandean. Francisco Javier Agea kantabriarrarekin egin zuen ihes Azparrenek, eta bukaerako sprintean menderatu zuen, bere aurreneko garaipena lortzeko, 142 kilometroko proban. Bertan izan zen Telmo Semperena astigartarra ere: 47garren izan zen.
Jubenil eta kadeteek, berriz, Gipuzkoako Taldekako Erlojupeko Txapelketarekin zeukaten hitzordu nagusia. Mutil jubeniletan, 34,6 kilometroko ibilbidean, laugarren izan zen Unax Urretabizkaia eta Aner Zilbeti hernaniarren Donosti Berri taldea (44:01); eta zazpigarren sailkatu zen Xabat Alonso, Mikel Goikoetxea eta Ekain Mitxelena hernaniarren Andoaingo taldea (44:51). Neska jubeniletan, Naya Mangasen Limousin taldeak bakarrik hartu zuen parte (41:09), 25 kilometroko ibilbidean.
Eta mutil kadeteetan ere, laugarren izan zen Tasio Semperena astigartarraren Donosti Berri. Denbora onenarekin zijoazela, Semperenaren lau taldekideak erori ziren, eta haietako bik bakarrik jarraitu ahal izan zuten. Denbora asko galduta, proba osatzea lortu zuten, baina podiumerako aukerarik gabe.