Zinearekin hitzordu bana izango dute asteburu honetan, Astigarragan eta Hernanin. Oraingoan, dokumental bat ikusteko aukera izango dute astigartarrek: Berri Txarrak taldearen Dardara ikusentzunezkoa, Ikusi Arte biran grabatutakoa. Erribera kulturgunean eskainiko dute gaur, arratsaldeko 19:00etan hasita. Euskeraz jarriko dute, gaztelaniazko azpitituluekin; eta 98 minutuko iraupena dauka. Azkeneko sarrerak 4 euroan jarriko dituzte salgai, emanaldia hasi baino ordubete lehenago, Erriberan bertan.
Hernaniarrek, berriz, pelikula bakarra izango dute Biterin, helduei zuzendutakoa: Una pasteleria en Notting Hill. Gaur hasi eta astelehenera bitarte eskainiko dute: gaur eta bihar, arratsaldeko 19:00etan hasita; eta astelehenean, ikuslearen egunean, 16:30etan.
Bere ama hil ondoren, haren ametsa bete nahi du Clarissak: Notting Hillen gozotegi bat irekitzea. Eta horretarako, laguntza eskatuko die amonari eta amaren lagun bati. Hiru belaunalditako emakumeek, gainditu egin beharko dituzte zalantzak, ezberdintasunak eta mina, amaren oroimena omentzeko.