Asteburuari hasiera emateko, partidu garrantzitsuak dauzkate gaur, bailarako esku pelotariek. Profesionaletan, semifinala jokatuko du Iker Salaberriak, promozio mailako buruz buruko txapelketan. Pello Etxeberriaren kontra jokatuko du goizuetarrak, 22:00etan hasita Gernikan, finalerako txartelaren bila. ETB1ek zuzenean emango du. Final laurdenetan Larrazabal menderatu ondoren (22-7), oso kontrario gogorra izango du Salaberriak. Gaur jokatuko dute beste semifinala ere, Egigurenek eta Erasunek.
Afizionatuetan, berriz, final laurdenetako joanekoa jokatuko du Astigarragak gaur arratsaldean. Tolosa hartuko du Txomiñenen, 18:30etan hasita. Emaitza onak lortu nahi dituzte esku pelotari astigartarrek, aldeko markagailuarekin joateko datorren asteburuan Tolosara, bueltakoa jokatzera.
Hernanik, bere aldetik, Azpeitia hartuko du igandean, arratsaldeko 16:30etan hasita, final laurdenetako joanekoan.
Eta Astigarragako palistek, kanpoan jokatuko dute joanekoa: Ibarran ariko dira bihar, 17:00etan, Tolosaren kontra.