Beste adin tarte baten immunizazioa hasiko dute bihar, Aranon eta Goizuetan. Izan ere, txertoaren aurreneko dosia jarriko diete, 50 eta 59 urte bitarteko aranoar eta goizuetarrei.
Leitzako kiroldegian izanen da hori, eta Areso eta Leitzako herritarrekin batera txertatuko dituzte haiek ere. Horretarako, hitzordua emanen diote bakoitzari: telefonoz deituko diete, Nafarroako Gobernutik.
Leitzako kiroldegian egin dituzte aurreko txertaketak ere. Dagoeneko jaso dituzte bi dosiak, 70 urtetik gorako aranoar eta goizuetarrek. 66 eta 67 urtekoek, berriz, maiatzaren 5ean jaso zuten aurreneko dosia; eta hilaren 11n, 68 eta 69 urtekoek. Laster izanen dute, bigarren dosia jasotzeko txanda.