Sei jardunaldi ikusgarriren ondoren, gaur bukatuko da Sagardoaren Txapelketako ligaxka, zazpigarrenarekin: Juanenea eta Zubiri (Larre-Gain sagardotegia) ariko dira aurrenekoan, Segurola eta Larrañagaren (Gaztañaga) kontra; eta bigarrenean, aurrez aurre izango dira Ansa II eta Labaka (Setien), eta Goikoetxea VI eta Aizpuru III (Gurutzeta). Gaueko 22:15etan hasiko da jaialdia Galarretan, eta zuzenean eskainiko du ETB1ek, Erremontari saioaren barruan.
Azkeneko partidua izango du gaurkoa Aritz Zubiri goizuetarrak, aurtengo txapelketan. Izan ere, ez daukate aukerarik semifinaletara sailkatzeko: azkeneko postuan daude, 4 punturekin. Orain arte ez dute partidurik irabazi, baina ondo bukatu nahi dute txapelketa, eta estreinako garaipena bilatuko dute gaurkoan, ligaxkako hirugarren sailkatuaren kontra.
Aldiz, dagoeneko bukatu du ligaxka Endika Barrenetxea hernaniarrak, baina adi-adi ikusiko ditu gaurko bi partiduak; bereziki, bigarrena. Bera eta Etxarri (Oialume Zar) sailkapeneko bosgarren postuan daude, 9 punturekin; eta puntu kopuru berarekin daude Goikoetxea V eta Aizpuru III, laugarren. Bi bikoteen artean dago jokoan semifinaletako azkeneko txartela, baina ez dauka erraza hernaniarrak: behar du Goikoetxeak eta Aizpuruk 16 tanto edo gutxiago egitea.
Semifinaletan ariko diren beste hiru bikoteak, dagoeneko zehaztuta daude: 16 punturekin daude Ansa II eta Labaka aurrena, eta Urriza eta Zaldua (Bereziartua) bigarren; eta 12 punturekin, hirugarren dira Segurola eta Larrañaga.
Haien artean, bakoitzak zein postutan bukatuko duen bakarrik dago jokoan.