Bi nobedade eman ditu aditzera Laiotz taldeak, azkeneko egunetan. Batetik, abeslari berria dauka taldeak, eta Itxaso Trekuk jarriko die ahotsa bere abestiei, aurrerantzean. Naroa Jaka izan da Laiotzen abeslaria, azkeneko urteotan, eta eskerrak eman nahi izan dizkio taldeak, elkarrekin egindako bideagatik, baita Jakak erantzun ere: «plazerra nirea izan da! Orain zuetaz behetik disfrutatzea tokatzen zait, nahiz eta hainbeste urteren ondoren faltan botatzen den tablatua», adierazi du abeslariak sare sozialetan.
Eta bestetik, kantu berria ere aurkeztu du Laiotzek: Elkartuko gara, sagardo munduari eskainitako abestia. Kantua bakarrik ez, bideoklipa ere osatu dute, eta ikusgai dago taldearen webgunean (laiotz.com), bere YouTubeko kanalean, Facebooken eta Instagramen. Oialume Zar sagardotegian grabatu dute bideoklipa, eta bertan, dagoeneko, Itxaso Treku bera da letrei ahotsa jartzen diena.