Ohi bezala, bat egingo dute maiatzeko egun eta ordutegian ere, Hernaniko eta Astigarragako Udalen Plenoek. Etzi izango dira biak, asteartearekin, arratsaldeko 19:00etan hasita. Telematikoki egingo du Hernanikoak, eta modu presentzialean Astigarragakoak, udaletxean. Eta oraingoan, mozioak eta adierazpen instituzionalak izango dira protagonista.
Gai-zerrenda laburra daukate lantzeko Astigarragan: kreditu aldaketa bat; Txalaka-Oialumeko Hiri Antolamenduko Plan Bereziari buruzko puntua; eta bi adierazpen instituzional. Aurrenekoa izango da Palestinaren aurka Israel egiten ari den erasoen ingurukoa; eta bigarrena, Kolonbiako egoerari buruzkoa.
'Hernani' Musika Eskolako zuzendaritza taldea berritzea, Plenoko gai-zerrendan
Luzeagoa izango da Hernaniko Plenoko gai-zerrenda. Apirileko dekretuei eta 2021eko aurrekontuaren exekuzioari buruzko informazioa eman ondoren, eztabaidatuko dute aldaketa egitea zuzeneko erregimeneko dirulaguntzetan. Udaletxeko lanpostuen zerrendan ere egingo dute aldaketarik: idazkaritzako atezain administrari laguntzaileen azpieskalako plaza birsailkatu eta amortizatu; eta Tokiko Garapeneko sailean administrari plaza sortu. Segidan, 'Hernani' Musika Eskola publikoa izango dute hizpide: zuzendaritza taldea berrituko dute.
Eta bukatzeko, landuko dituzte lau mozioak. Bi aurkeztu ditu EH Bilduk: energia iraunkortasun legea betetzeko udalek behar duten finantziazioaren ingurukoa; eta Kolonbia eta Palestinako herriei elkartasuna adieraztekoa. Eta beste biak dira Elkarrekin Podemos-Orain Hernanirenak: Hernaniko pobrezia menstrualarekin amaitzekoa; eta kalean dauden pertsonen eskubideak defendatzekoa.