Ikuslerik gabe eta herritarren animoen faltan, baina asteburu honetan hasiko da denboraldiko txapelketa herrikoiena, esku pelotarientzat. Atzo ekin zion Herriarteko Txapelketari Astigarragak, Bergaran, final zortzirenetako joaneko partiduekin. 2019an lortutako balentriaren ondotik, txapela defendatzea dagokie astigartarrei, joan den urtean ez baitzen jokatu.
Eta bihar goizean izango da Hernaniren txanda. Aretxabaletaren kontra hasiko du bidea, final zortzirenetan; eta Aretxabaletan bertan ekingo dio, bihar goizeko 11:00etan hasita. Kadete mailako partiduan, Unax Manterola eta Oier Alegria ariko dira; jubeniletan, Unax Uitzi eta Unai Etxarri izango dira Hernaniren ordezkari; eta nagusietan Paul Ojuelek eta Markel Lizeagak jokatuko dute. Hiru partiduetan izango dira faborito hernaniarrak, eta hirurak irabazi nahi dituzte, bueltakoetan lasaiago jokatu ahal izateko, Hernanin.
Guztira, 16 herrik eman dute izena, eta final zortzirenetan hasiko dira denak, honako kanporaketekin: Oñati/Azpeitia, Andoain/Tolosa, Alegia/Zestoa, Bidania-Goiatz/Amezketa, Aduna/Ataun, eta Oiartzun/Azkoitia.
Irabaziz gero, Hernanik Oñati edo Azpeitia izango luke kontrario final laurdenetan, eta Astigarragak Andoain edo Tolosa.
Trinketeko finaletan gaur, bailarako bi bikote
Gipuzkoako Txapelketetan, bestalde, trinketeko binakako finalak jokatuko dituzte gaur, Irurako Ametsan, eta bailarako bi bikote ariko dira. Mattin Arluziaga eta Xabier Apaolaza hernaniarrak ariko dira aurrena, jubenil mailakoan, 16:30etan hasita. Behar Zanako Aburuza eta Iraola izango dituzte kontrario, eta hernaniarrak dira txapela janzteko faborito, sailkapen fasean partidu guztiak irabazi ondoren. Eta segidan jokatuko dute Aimar Mujika eta Oier Gurutzealde astigartarrek, nagusien bigarren mailako finala. Soraluze izango dute aurrean.
Eta Goizuetan, azkenik, Mendialdeko Txapelketako partiduak jokatuko dira bihar, nagusietan, goizeko 10:00etan hasita. Horietako batean ariko da Antton Apezetxea, Irurtzungo Armendarizekin, Larraungo Lansalot eta Gurrearen kontra.