Lasterketa askorik gabe, baina errepidean eta pistan banatuta aritu dira bailarako txirrindulariak, asteburu honetan.
Pistako Euskadiko Txapelketa jokatu zuten larunbatean, Berrizko Marino Lejarreta belodromoan; eta bertan aritu zen Tasio Semperena astigartarra, kadeteetan. Lau probaz osatutako omniumean hartu zuen parte, eta oso maila onean aritu zen: laugarren bukatu zuen, podiuma esku-eskura izan ondoren. Scratchean laugarren izan zen aurrena, baita tempo proban ere, eta bigarren izan zen eliminazioan. Hori horrela, sailkapen nagusiko bigarren postuan iritsi zen azkeneko probara. Horretan, baina, aurreko esfortzuaren nekea nabaritu zuen, eta luze egin zitzaion: azkeneko sprinta zazpigarren bukatu zuen, eta bi lehiakidek hartu zioten aurrea.
Erlojupekoan onenekin berriro, Xabier Mikel Azparren
Errepidean, bestalde, Algarveko Itzulian aritu zen Xabier Mikel Azparren, profesional mailan, Portugalen. Bost etapa izan ziren, eta beste behin, erlojupeko proban eman zuen oso maila ona astigartarrak, laugarren etapan: 15garren sailkatu zen, eta Kasper Asgreen irabazleak baino 1:23 gehiago behar izan zuen 20,3 kilometroko ibilbidea osatzeko. Erlojupekoa osatzen aurrenekoetakoa izan zen Azparren, eta denbora batez izan zen markarik onenarekin.
Azkeneko etapa, berriz, Malhao mendatean bukatu zuten, eta 43garren sailkatu zen Azparren. 117garren bukatu zuen sailkapen nagusian.
Eta jubenil mailan, azkenik, Lazkaomendiko Proba jokatu zuten larunbat arratsaldean. Xabat Alonso hernaniarra izan zen bailarako ordezkari bakarra, eta 48garren bukatu zuen.