Asteburu garrantzitsua dute aurretik Mundarrok eta Hernanik taldeek. Hasteko, Ohorezko Erregional mailako taldeak lehenengo faseko azken partidua jokatuko du gaur, arerio zuzen baten kontra. Astin, 16:30etatik aurrera, Zarautzen aurka neurtuko ditu indarrak, eta bi taldeak bi punturen aldearekin daude sailkapenean.
Hernani bigarrena da sailkapenean, 17 punturekin, eta Zarautz hirugarrena, 15 punturekin. Igoera fasera sailkatzen diren taldeak, beraien arteko partiduetan lortutako puntuekin pasako dira, eta horregatik dira puntuak hain garrantzitsuak. Gainera etxekoek ez daukate ziurtatuta sailkapena oraindik.
Hernaniko Euskal Ligako taldeak eta jubenil nazionaleko taldeak ere etxetik kanpo jokatuko dute. Hernaniko jubenilak San Vicente zelaian ariko dira gaur, 16:30etatik aurrera, Barakaldoren kontra. Pasa den asteko lehenengo garaipenari jarraipena eman nahi diote. Barakaldok bederatzi puntu gehiago ditu partidu bat gehiago jokatuta.
Euskal Ligako taldeak bihar jokatuko du, eguerdiko 11:30etan, Karla Lekuona zelaian, Oiartzun-Intxaurdiren aurka. Hernaniarrak hirugarren dira sailkapenean, eta oiartzuarrak laugarren, jaitsiera ekiditeko multzoan.
Mundarro Berion gaur, eta Hernani-Urnieta bihar Zubipen, Preferente mailan
Preferente mailan ere, Mundarrok etxetik kanpo jokatuko du gaur, 15:30etan. Santo Tomas Lizeoaren aurka ariko da Berion. Astigartarrak bosgarren daude sailkapenean, sei punturekin; eta donostiarrak seigarren, bi punturekin. Zubipen jokatuko duena Hernani izango da. Urnietaren aurka ariko da bihar, 16:30etan hasita.