Konpromiso gutxirekin dator asteburua, bailarako saskibaloi taldeentzat; baina partidu erakargarria jokatuko dute gaur, Astigarragan: Mundarro eta Hernani ariko dira elkarren kontra, mutil jubeniletan. Arratsaldeko 16:00etan izango da, kiroldegian. Hasiera konplikatua izan dute bi taldeek ligan, eta jokatutako bi partiduak galdu dituzte. Beraz, estreinako garaipena lortzeko gogotsu iritsiko dira biak, derbira.
Gainerako kategorietan, berriz, atseden hartzeko asteburua zeukaten bailarako taldeek, baina bere partidua aurreratu dute Hernaniko mutil seniorrek, eta gaur jokatuko dute Gipuzkoako lehenengo mailakoa. Donostian ariko dira, Santo Tomas Lizeoaren kontra, eguerdiko 12:00etan hasita. Partidu zaila izango dute hernaniarrek, orain arte jokatutako bi partiduak irabazi baititu talde donostiarrak. Baina aurreneko garaipenaren bila joango dira, edonola ere.
Mundarroko neska zein mutil seniorren taldeek, aldiz, ez dute partidurik izango, asteburu honetan.