Apirilaren 3an Reala eta Athleticen artean jokatuko den Errege Kopako finala dela eta, Realak eta Gipuzkoako hainbat herrik bandera trukaketa egin dute. Hernani eta Astigarragak ere bat egin dute ekimen honekin. La Cartujan jokatuko da Errege Kopako finala, eta egungo egoerak behartuta, gradak hutsak egongo direnez, «Gipuzkoako herrietako eta futbol taldeetako banderak jarriko dira gradetan». Honela, modu sinboliko batean, Gipuzkoako herritarrak eta Realeko jarraitzaile sutsuak ordezkatuko dira, aipatu moduan, Gipuzkoako herrietako zein futbol taldeetako banderak, gradetan jarriz.
Gaur arratsaldeko 17:00etan, Zubipen egingo dute Realaren eta CD Hernaniren arteko bandera trukaketa. Astigartarrek, berriz, atzo arratsaldean egin zuten Andoainen: Mundarroko Jon Goiburuk Realeko bandera jaso zuen, Luki Iriarte eta Maite Arzuaga talde txuri-urdineko ordezkarien eskutik.