Joan den asteburuan bueltatu dira kantxara, Hernaniko eta Mundarroko saskibaloi talde nagusiak, mutiletan. Etxean aritu dira bi taldeak, baina ezin izan dute garaipena lortu, aurreneko partiduan. Tolosako TAKEren kontra galdu zuen Hernanik (58-66); eta Donostiako Atletico San Sebastianen kontra Mundarrok (61-71), luzapenean.
Primeran ekin zioten partiduari astigartarrek, eta aurreneko laurdena 16na berdinduta bukatu ondoren, bost punturen aldea lortu zuten atsedenaldirako (33-28). Aurretik jarraitu zuten, hirugarren laurdena bukatuta ere (39-37).
Eta azkeneko laurdenean, oso estua izan zen lehia: 44-47 atzetik izan ondoren, 49-47 aurreratu ziren astigartarrak, azkeneko minutuan; baina partidua berdintzea lortu zuten donostiarrek, partidua bukatzear zela (49-49). Horrela, luzapena jokatu behar izan zuten; eta bost minutu horietan, ia jaurtiketa guztiak sartu zituzten donostiarrek; guztira 22 puntu. Horren aurrean, ezer gutxi egin ahal izan zuten astigartarrek, eta 12 puntu lortu arren, 61-71 galdu zuten.
Oso bestelakoa izan zen partidua, Hernanirentzat. Hasieratik egin zuen ihes TAKEk, eta aurreneko laurdenean sei punturen aldea lortu ondoren (14-20), 24-34 iritsi ziren atsedenaldira. Partiduak ez zuen hobera egin hernaniarrentzat, aldageletatik bueltan, eta 14 puntura haunditu zuen aldea talde tolosarrak, hirugarren laurdenean (43-57). Azkeneko laurdenean lortu zuten tartea pixka bat murriztea hernaniarrek, baina irabazteko aukerarik ez zuten izan (58-66).