Martxoaren 8a da gaur, Emakumeen Nazioarteko Eguna; berdintasunaren aldarria inoiz baino ozenago zabaltzeko egun seinalatua. Urtero aireratzen diren mezuetako bat da, gaur bakarrik ez, egunero dela martxoak 8; egunero dela berdintasunaren bidean aurrerapausoak eman, eta berdintasunezko gizarte bat eraikitzeko eguna.
Eta aurten, inoiz baino egun gehiagotan izan da martxoak 8. Izan zen atzo, izan zen herenegun, eta izan zen ostiralean. Egun seinalatuaren zain egon gabe, makina bat ekintza antolatu dituztelako bailaran, kolore morea lau haizetara zabaltzeko. Eta horrela, herriz herri antolatutako ekintza zaparradek haunditu duten ibaia, itsaso more bilakatuko da gaur. Pandemia garaia izanagatik, ez baitute etxean geratu nahi izan, eta kaleak beteko baitituzte, antolatu diren mobilizazioekin.
Astigarragan jarri dute eguneko aurreneko hitzordua, goizeko 11:00etan Erribera kulturgunean. Bertan, erakusketa jarri du Carmen Ibañez hernaniarrak, indarkeria sexistarengatik hildako emakumeen omenez egindako instalazioa; eta gaur inauguratuko dute. Martxoaren 20ra arte egongo da ikusgai.
Pankartak egin zituzten astigartarrek, Emakumeon Etxearen egun osoko festan.
Ondoren, Astigarragan bertan, kontzentrazioa egingo dute Foru Plazan, eguerdiko 12:15etan.
Goizuetan, berriz, arratsaldeko 18:00etan egingo dute elkarretaratzea, herriko plazan. Girorik ez dute faltako bertan: Hip-hop dantza taldeak emanaldia eskainiko du, zuzeneko musika eta guzti.
Eta Hernanin, 19:00etan hasiko da manifestazioa, hiru zutabetan banatuta, jende pilaketak saihesteko: Carmen Adarraga parketik, Karabelgo Oleta plazatik, eta Zerbitzu Sozialen ondotik abiatuko dira, Koordinadora Feministak antolatuta.
Gainera, Lilatoi birtuala osatzeko zita jarri dute gaur goizerako, Hernanin barrena. Goizuetan, larunbatean aritu ziren, talde txikitan (Felix Loiarteren argazkiak ikusgai, kronika.eus web orrian); eta Astigarragan, atzo goizean ere bazebiltzan herritarrak, lasterketaren 5 kilometroak elkarrekin osatzen.
Aldarrikapen ekintzek segida
Baina gaur ez dira bukatuko aldarrikapenak. Aurreko egunetan bezala, bihar ere izango delako martxoak 8, eta baita etzi eta etzidamu ere. Horrela, ekintza gehiago izango dira datozen egunetan, bailaran.
Bihar, zita bikoitza dute Hernanin. Batetik, Emariak eta Kahoot Feminista jolasetan ariko dira Gaztelekuan, arratsaldeko 17:30etan hasita. Eta Biterin, 18:00etarako, hitzaldia antolatu du Amherrek: Ikasketen homologazioa eta beste lan-eremu batzuetarako sarbidea, Bidez Bide elkarteko Katia Reimbergen eskutik.
Bihar bertan, Aranon, inauguratuko dute Zaintza pandemia garaian erakusketa, elkarteko arkupeetan. Hilaren 21era arte egongo da ikusgai bertan.
Eta etzi, Panpina antzerkia eskainiko dute Biterin, arratsaldeko 19:00etan hasita. Horretarako gonbidapenak, Plaza Feministan eskatu beharko dira goizez; edota emailez idatzita: berdintasuna@hernani.eus.