Profesionaletan ez ezik, afizionatu mailan ere martxan zegoen txapelketa bat edo beste, dagoeneko; eta aste honetan gehituko zaizkie gehiago, Nafarroan zein Gipuzkoan, eskuz zein palaz, eta frontoian zein trinketean. Betiere, osasun egoerak hala baimentzen duen bitartean.
Gipuzkoan, aste honetan hasi dute Trinketeko Kluben Arteko Gipuzkoako Txapelketa. Eskuz banakako eta paleta argentinarreko lehiarekin ekin dio, eta tartean izango dira bailarako pelotariak ere: Gurutzealde eta Mujika astigartarrak, eta Alegria, Urdanpilleta, Martin, Jara, Labaka eta Alvarez hernaniarrak.
Asteburu honetan hasiko da, baita ere, lau t'erdiko Gipuzkoako Txapelketa, frontoian, eskuz banaka. Eta horretan, bailarako pelotari gehiago ariko dira: Astigarragako Goñi, Exposito, Lizeaga anaiak, Loidi eta Santxez; eta Hernaniko Salaberria, Arluziaga, Iturbe, Arizmendi, Etxarri, Apaolaza, Oiartzabal, Uitzi, Altuna, Elizazu, Urkizu, Arabaolaza eta Manterola.
Eta Nafarroan ere ekingo diote eskuz banakako lehiari, hamar goizuetar tartean direla: Alsua, Larin, Aranberri, Zurutuza, Garmendia, Sagardui, Legarreta, Salaberria, Narbarte eta Aranberri. Arozenak eta Zelarainek, aldiz, binakako txapelketarekin jarraituko dute gaur.
Olaizolak eta Salaberriak, bihar hitzordua Bilbon
Profesional mailan, berriz, laugarren jardunaldiko partidua izango dute Aimar Olaizolak, Binakako Txapelketa Nagusian; eta Iker Salaberriak, Promozio mailakoan. Bilbon ariko dira, bihar arratsaldeko 17:00etan hasita: Beñat Rezustarekin ariko da Olaizola, Altuna III eta Mariezkurrena IIren kontra; eta Oier Etxebarriarekin jokatuko du Salaberriak, Larrazabal eta Eskirozen kontra.