Eukaliptoak ingurumenean, eta Urumea bailaran zehazki, daukan eraginaren inguruan, erreportajea argitaratu zuen Kronikak, aurreko larunbatean: «Zer gertatuko litzateke, Tilosetako tiloak moztu eta eukaliptoak landatuko bagenitu bertan?».
Erreportajeak izan du oihartzuna, eta bailaratik kanpo ere zabaldu da; Iurretara (Bizkaia) iritsi da, behintzat. Izan ere, Kronikaren erreportajean oinarrituta, eukaliptoaren inguruko komikia osatu du Eñaut Aiartzaguena Bravo marrazkilari iurretarrak, eta sare sozialetan argitaratu du. Ezkerrean dagoen hau da, hain justu, komikia.
Ingurumenarekin lotutako beste hainbatetan bezala, Iñaki Sanz-Azkue biologo hernaniarraren ekarpenarekin landu zuen erreportajea Kronikak, eta Arturo Elosegi Landare-Biologia eta Ekologia katedradunarekin, ere hitz egin zuen. Hernaniko Udaleko Ingurumen Saileko arduradunen eta Ereñotzuko alkatearen ikuspegia eta kezkak ere jaso zituen Kronikak, erreportajean. Irakurgai dago, osorik, kronika.eus web orrian.