Azaroko hitzorduak bertan behera gelditu behar izan zuen. Hala ere, Harkaitz Delgado Leitzako liburutegiko liburuzainak ez du hutsik eginen abenduan; Goizuetako eta Aranoko herritarrak gaur bisitatuko ditu. Lehenik, goizuetarrengana hurbilduko da eguerdiko 14:30etan, eta ordubeteko geldialdia eginen du. Ondoren, Aranora abiatuko da eta arratsaldeko 16:00etan helduko da bertara; kasu horretan, berriz, ordu erdi egonen da aranoarrekin.
Leitzatik abiatuko da haurrentzako zein helduentzako liburuekin, eta geldialdia eginen du bi herri horietan. Autoko maleteroa ireki, kaxak atera, eta eskaintza zabala eginen die aranoarrei eta goizuetarrei. Liburuez gain, aukera dago pelikulak ere mailegatzeko. Hori horrela, aurretik hartutakoak bueltatzeko eta berriak hartu ahal izanen dituzte liburutegi ibiltariaren bisitara gerturatzen diren herritar guztiek.
Horrez gain, interesa dutenek, liburutegiko bazkide egiteko aukera izanen dute. Liburuzainari asmoa adierazi eta bertan eginen du tramitea, Liburutegi Ibiltaria herrian dagoen bitartean.