Bada oraindik gure artean, 1918 eta 1919ko gripearen pandemia bizitu zuenik; eta gehiago dira, XXgarren mendeko Mundu Gerrak eta Gerra Zibilak ezagutu dituztenak. Urteak edo garaiak markatzen dituzten gertakariak dira horiek, denbora luzez gogoratzen direnak. Baina herritar gehienok, orain arte, ez dugu ezagutu eta bizitu aurtengoa bezalakorik; eta beharbada, ezta berriro biziko ere.
2020 urtea hankaz gora jarri du COVID-19aren pandemiak, martxotik urte bukaerara bitarte; eta noiz arte luzatuko den ere ezin jakin oraindik. Baina ziur, urte luzetan, eta akaso bizitza osoan, gogoratuko dugu, erabat ezohikoa izan zen 2020 hura: etxetik atera ezinik egon ginenekoa, denak maskarillak jantzita ibili ginenekoa, egunerokoan ia beste gairik ez zenekoa, ekitaldi eta jarduera ia guztiak bertan behera geratu ziren garaia...
Kontatu zuen hitzetan, nolakoa izan den 2020 urtea
Pandemia honek urrundu egin gaitu kasu askotan, elkarrengandik gertuago sentiarazi ere bai, beste zenbaitetan. Guztiok bizitu dugu urte berezia bezain arraroa, urte gogorra, zenbaiten bizimodua ere aldatu egin duena. Eta beraz, guztiok daukagu zer kontatua, 2020 urteari buruz. Horregatik, zuen kontakizunak jaso nahi ditu Kronikak, horien bidez deskribatzeko eta aurpegia jartzeko aurtengo urteari. Nola bizitu duzue zuek, Urumea bailarako herritarrok, 2020a?
Zuen testu eta argazkiak jaso nahi ditugu, erakutsiz nolakoa izan den urtea zuentzat. Bidali kronika@kronika.eus helbidera, posta elektronikoz; edo entregatu Kronikaren bulegoan (Larramendi 11, behea).
Jasotako testu guztiak argitaratuko ditu Kronikak, papereko edizioan zein kronika.eus web orrian, urteari errematea jartzeko, abenduan zehar.
Zer behar dugu horretarako? Nahi duzuen luzerako testu bat, urtea nola bizitu duzuen kontatuz: orri osokoa izan daiteke (7.000 karaktere inguru), orri erdikoa (3.000 karaktere), edo nahi izanez gero, luzeagoa edo laburragoa ere bai! Testuarekin batera, argazki bat (edo gehiago!) ere jaso nahi ditugu, aurtengo momenturen bat islatuko duena, kontakizunari laguntzeko. Eta noski, jarriozue izenburu bat ere, zuen urteari!
Herritar, familia, koadrila, auzo elkarte, talde, elkarte zein enpresak, kontalari
Bakardade momentuak bizi izan ditugu pandemiaren eraginez, baina laguntzarik ere ez dugu falta izan, une gogorrenei aurre egiteko. Ondoan izan ditugu senideak eta lagunak, baina baita beste batzuk ere. Auzo batzuetan, bizilagunek elkarrekin egin zioten aurre konfinamenduari, balkoietatik mota guztietako ekintzak antolatuz. Beste batzuek, pandemiaren garai lasaiagoetan, elkarte edo taldeetan bilatu dute pandemiaren egunerokotik ihes egiteko aukera.
Horregatik, guztiak izan daitezke 2020aren kontalari. Herritar batek bere urtea nolakoa izan den kontatu dezakeen bezala, familia oso batek ere kontatu dezake, nolakoa izan den bere urtea. Edo koadrila batek, nola bizitu duen lagunak ezin elkartzearena, eta nolakoa izan den gero berriro elkartzea. Baita auzo elkarteek, taldeek eta elkarteek ere, zein zailtasun izan dituzten, zer suposatu duen urteroko ekintzak bertan behera utzi behar izateak, zein alternatiba bilatu dituzten... Edota enpresek eta langileek, ostalariek edota merkatariek, zein zailtasun izan dituzten pandemiak eragindako krisiarekin, nola bizitu duten barrutik... Badira, era berean, pandemiaren aurreneko aste edo hilabeteak etxetik urrun bizi zituztenak, kanpoan ikasten edo lanean ari zirelako, oporretan harrapatu zituelako...
Pandemiak hamaika egoera ezberdin eragin ditu, eta horiek bildu nahi ditugu, zuen hitzetan eta ahalik eta aniztasun haundienarekin kontatzeko 2020 urteak eman eta kendutakoa.
Beraz, animatu zuen kontakizuna idaztera! Pandemia hasi zenetik, herritar eta talde askoren testigantzak jaso ditu Kronikak; baina zuena, beste guztiona, falta zaigu. Eta zuek ere badaukazue zer kontatua!
Idazteko erraztasuna edo zailtasuna, behintzat, ez dadila oztopo izan horretarako. Kronika arduratuko da testuak zuzentzeaz eta, hala behar izanez gero, baita itzultzeaz ere.