Osasun Publikoak gaur egun bizi duen egoera «larria» salatzeko mobilizazio dinamika jarri dute martxan, eta atzo greba eguna izan zuten Gipuzkoako osasun langileek. «Urteak dira Osakidetzan egiturazko arazoez gain baliabide falta nabaria ematen ari dela. Pandemiak arazo guzti hauek modu gordinean agerian utzi ditu. Eguneroko lanari falta diren langileen lana gehitu behar zaie, bajak kubritzen ez direlako kasu gehienetan. Pandemiari aurre egiteko ehundaka PCR egiten ditugu astero inongo errefortzurik gabe. Baliabide nahikorik gabe ari gara artatu beharreko gaixo guztiak ikusten, eta ez gara iristen. Inoiz baino lan gehiago egiten ari garen garai hauetan, inoiz baino zailagoa izaten ari da kalitatezko zerbitzu bat bermatzea», azaldu dute Hernaniko anbulategiko bozeramaileek.
«Irtenbiderik eza ikusita», kalera irten ziren, honakoak aldarrikatzeko: Osasun publikoaren aurrekontuak haunditzea, langile kopurua gehitzea, behin behineko langileak egonkortzea, murrizketa bidez galdutakoa berreskuratzea, pribatizazioak gelditzea, eta plantilaren segurtasuna eta osasuna bermatzeko neurriak hartzea. «Osasuna erdigunean jartzeko garaia da».