Eskualdeko Gazte Plana idatziko dute datozen hilabeteotan, Leitza, Areso, Goizueta eta Aranoko Gizarte Zerbitzuen Mankomunitateak bultzatuta. Zehazki, prebentzio zerbitzuak eramanen du prozesua aurrera, eta lau herrietako gazteen «partaidetza zuzena» bilatuko du; 12-30 urte bitartekoena, hain justu. Udaletako langileekin elkarlanean osatuko dute Gazte Plana, haiek ahaleginduko direlako gero, antzematen diren beharrei erantzuna ematen.
Aurreneko fasean, diagnostikoa eginen dute, eskualdeko gazteen errealitatea ezagutzeko: «fase honetan garrantzia berezia hartuko du gazteei zuzendutako online gadetegiak», nabarmendu dute. Azaroaren 22ra arte izanen da galdetegia betetzeko aukera, interneten, helbide honetan: labur.eus/gazteplana. 16 eta 30 urte bitarteko gazteei dago zuzenduta galdetegi hori, anonimoa da, eta erraz betetzeko modukoa. «Horregatik, deia luzatu nahi diegu 16 urtetik gorako gazteei, bere ekarpena egin dezaten, galdetegia beteta».
Izan ere, adin horretatik beherakoek, 12-16 urte bitarteko gazteek, institutuan izanen dute aukera, galdetegia betetzeko.
Hainbat gazteri elkarrizketak, hurrengo fasean
Diagnostikoaren ondoren, hurrengo faseari emanen diote hasiera. Eta horretan, ekintza plana definitzeko urratsak emanen dituzte, gazteekin eta udal langileekin batera.
Fase horretan, hasteko, elkarrizketak eginen dizkiete hainbat gazteri. Eta ondoren, jasotako proposamenak landuko dituzte, Udaletako langileekin.
Azkeneko fasean, bilera irekiak egitea planteatzen zuten, baina ez egitea erabaki dute azkenean, COVID-19aren aurkako prebentzio neurri gisa. Horregatik, egokitu egin dute azkeneko faserako metodologia.
Prozesuari buruzko informazioa, eskuragarri dago Udalen webguneetan, eta LAGA Gizarte Zerbitzuen sare sozialetan.