Leitza, Goizueta, Areso eta Aranoko prebentzio programak eta berdintasun zerbitzuak, argazki lehiaketa bat antolatu dute Goizuetako eta Aranoko 15 urtetik gorako biztanleei zuzendua.
Bhutan proiektuaren baitan garatutako ekimena da. Zaintza pandemia garaian izeneko lehiaketa honetan konfinamenduan eta orokorrean testuinguru berri honetan zaintzak bizitzaren sostengurako zenbaterainoko garrantzia izan duen, duen eta izango duen islatzea da helburu nagusia. «Argazkien bidez Goizueta eta Aranon eman diren zaintzak, tratu onak eta horrek herri bezala dakartzan baloreak argitara atera nahi ditugu», azaldu dute antolatzaileek.
Zaindu eta zaintzaile paperak inoiz baino nabarmenagoak izatera eragin du COVID-19ak eta kontziliazioa, tratu onak, komunikazioa, elkarbizitza eta elkartasuna bezalako hitzen indarrak herritarren behar eta nahietan nozitzea eragin du. Horregatik, diote, bizitzarako lehentasunak balore horietan oinarritzen direla «argi» geratu dela, eta horren baitan antolatu dute lehiaketa.
Azaroaren 12a, lanak aurkezteko azken eguna
Argazkiak lagatratuonak@gmail.com helbidera bidali beharko dira urriaren 22tik azaroaren 12ra bitarte eta parte-hartzaile bakoitzak bi argazki aurkezteko aukera izanen du.
Parte-hartzaile guztien artean bi sari potolo egonen dira jokoan. Batetik, epaimahaiak aukeratuko duen irabazlearen saria: Elgorriagako bainuetxean ibilbide termala, bazkaria eta masajea 2 pertsonentzat. Eta bestetik, sari parte-hartzailea, zozketa bidez parte-hartzaile guztien artean erabakiko dena. Azken hau 2 pertsonentzat ibilbide termala izanen da, Elgorriagako bainuetxean.