Guztira 25 udalerri dira: bost Bizkaikoak eta hogei Gipuzkoakoak. Herri horietan zorrotzagoak izango dira koronabirusaren hedapena saihesteko neurriak, eta, besteak beste, tabernek eta saltokiek 21:00etan itxi beharko dituzte ateak. Neurriok gaur bertan sartuko dira indarrean, EAEko aldizkari ofizialean argitaratu orduko.
Osasun sailak, gomendio orokorrak eman ditu, eta mugikortasuna ahalik eta gehien murrizteko helburua izanik, «herritik ez ateratzeko eta herrira ez sartzeko aholkatu dute, ohiko salbuespenetan izan ezik: lana, ikastea, menpeko pertsona bat zaintzea, eta abar».
Kirol jarduerari dagokionez, eten egingo dituzte taldeko kirol jarduera guztiak, bai instalazio itxietakoak, bai irekitakoak, lehiaketa ofizialetakoak izan ezik. Hortaz, neurri horien ondorioz, kirola bakarka soilik egin ahalko da 25 udalerri horietan. Haur parkeak, parke publikoak eta terrazak ezin izango dira erabili 21:00etatik 08:00etara artean, horietatik igarotzeko ez bada.
Tabernak itxita
Tabernetarako eta jatetxeetarako ere indarrean egongo da ordutegi muga hori: 21:00etatik 08:00etara itxita egoteko agindua. «Horrez gain, tabernetan debekatuta egongo da barran kontsumitzea: mahaian eta eserita soilik hartu ahalko dira janari-edariak. Baldintza horietara egokitzen ez diren jarduerak koktelak, esaterako debekatuko dira».