Zita garrantzitsua zeukaten larunbatean, Mendaron, jubenil mailako txirrindulariek. Bertan izan zen Enekoitz Azparren astigartarra, indartsuenen artean. Garaipenak, ordea, azkeneko esprintean egin zion ihes, aurrea hartu baitzion Beñat Carbayeda lasartearrak. Denei aurrea hartuta iritsi ziren biak, helmugako azken aldapara. Atzetik sartu zen Unai Cueva, hirugarren.
Ez zuen Gipuzkoako txapeldunaren maillota eskuratu astigartarrak, beraz; baina mendiko sailkapena bai, berak irabazi zuen, Kalbario gainetik bigarren eta aurrena pasata, lasterketaren bi igoeretan.
Kadete mailako lasterketa ere izan zen larunbatean, Lazkaon: Hesparru Proba. Eta bertan izan ziren bailarako hiru txirrindulari. Ezin izan zuten aurreko postuetan sailkatu, eta Unax Urretabizkaia izan zen hiruetan onena, 49garren, Aimar Madina irabazlea baino minutu eta 50 segundu beranduago iritsita Lazkaomendiko helmugara. Tasio Semperena astigartarra, berriz, 84garren izan zen, eta 89garren helmugaratu zen Ekhi Muñoz herrikidea. Taldeka laugarren izan ziren hirurak, Donosti Berrirekin.