Datozen bi asteotan jarriko diete gripearen kontrako txertoa, arrisku taldeetako herritarrei

Martxan da gripearen kontrako txertaketa kanpaina, Gipuzkoan zein Nafarroan; eta bietan, arrisku taldeetako herritarrek izango dute lehentasuna. Horiei, hernaniar eta astigartarren kasuan, telefonoz deituko die Osakidetzak, hitzordua emateko; eta datozen bi asteotan jarriko di­e­te txertoa.

Hernanin, kiroldegia prestatu dute txertaketa kanpaina ho­netarako; eta Astigarragan, anbulatorio zaharrean izango da.
Arrisku taldeetakoak ez direnek, berriz, urriaren 31tik au­­rrera izango dute aukera, txertoa jarri nahi badute. Horretarako, telefonoz deitu beharko dute, da­gokien osasun zentrora (Hernanin 943 00 66 66, eta Astigarragan 943 33 56 44); eta ba­koitzaren egoera baloratuko du Osakidetzak.

Nafarroan ere, lehentasuna emango diete arrisku taldeetako herritarrei; baina beraiek deitu beharko dute hitzordua eskatzeko, dagokien osasun zentrora. Aranoarrek eta goizuetarrek, be­raz, Leitzako osasun zentrora deitu behar dute: 948 51 08 33.

Osakidetzak zein Nafarroako Gobernuaren osasun sailak nabarmendu dute, aurten are eta garrantzitsuagoa dela gripearen kontrako txertoa jartzea, bereziki arrisku taldeetako herritarren artean: 60-65 urtetik gorakoak, gaixotasun kronikoak dituztenak, haurdun dauden emakumeak, eta osasungintza­ko langileak.

Nafarroan, azaroaren 27ra arte luzatuko da gripearen aurkako txertaketa; eta Gipuzkoan ere, aste horretan bukatuko da, baina baliteke luzatzea ere.