Zaintza lanei buruzko jardunaldiak egingo dituzte eskualde mailan, Beterri-Buruntzaldean, datorren astean. Udalek eta Emaginek elkarlanean antolatuta, bi eguneko jardunaldiak izango dira, urriaren 23an eta 24an; eta Hernanin egingo dituzte biak: ostiralekoa Milagrosan, eta larunbatekoa Biterin.
Zehazki, zaintza lanak demokratizatzeari begirako saioak izango dira, hitzaldi, aurkezpen, mahai inguru eta eztabaidekin. Aforoa mugatua izango denez, beharrezkoa da izena ematea, aldez aurretik. Horretarako, telefonoz deitu daiteke 943 59 09 02 zenbakira, edo emagin.eus web orrian egin daiteke, formulario hau beteta. Izena eman daiteke bi egunetarako, edo egun bakarrerako. Haurren zaintzarako zerbitzua ere izango da aukeran.
Argitara, eskualdeko zaintza erregimenaren diagnostikoa
Ostiralean egingo diete harrera, jardundietako partehartzaileei, arratsaldeko 17:30etan Milagrosan. Eta ordu erdi beranduago hasiko da aurreneko saioa: hitzaldia eskainiko du Matxalen Legarretak, Euskal Herriko Unibertsitateko irakasleak: Zaintzak erdigunera. Zertaz ari gara?
Ondoren, 19:00etan hasita, eskualdera ekarriko dute zaintza lanen gaia. Izan ere, Beterri-Buruntzaldeako zaintza erregimenaren diagnostikoa eta ekintzarako proposamena prestatu du Emaginek, eta Milagrosan aurkeztuko du, jardunaldietan.
178 orrialdeko txosten mardula osatu du Emaginek, gaiaren inguruan, Zaintza lanen demokratizaziorantz izenburupean. Txosten osoa, dagoeneko ikusgai dago interneten, emagin.eus web orrian, jardunaldiei buruzko albistean bertan.
«Zaintza lanak demokratizatzeko prozesuan lagungarri izatea nahi dugu; eraldaketaren pizgarria, berregituratze baterako oinarrizko tresna, eta eztabaida soziala sustatzeko erreminta», diote. Buruntzaldeako herrietan (Astigarragan, Hernanin, Urnietan, Lasarte-Orian, Andoainen eta Usurbilen), zaintza lanak nola antolatzen diren aztertu dute, eta «zaintza erregimena aldatzen hasteko, ekintzarako tresna bat sortu», nabarmendu dutenez.
Zehazki, ikertu dute eskualdeko zaintzaileen egoera, eta dauden baliabideak; eta proposamena garatu dute, identifikatu dituzten beharrei «erantzun bateratua» emateko.
Zaintza lanei buruzko herri eztabaida, larunbatean
Larunbateko saioa, berriz, goizeko 10:00etan hasiko dute, Biteri kultur etxean. Mahai inguru batekin ekingo diote, eta bertan hartuko dute parte, lau kolektibotako ordezkariek: Radars Barcelona, Maitelan, Trabajadoras No Domesticadas eta Herrilab.
Eta jardunaldiak bukatzeko, herri eztabaidarako tartea egingo dute, eguerdiko 12:30etan hasita. Herri lanen demokratizazioa izango da eztabaidarako gaia, hain justu; eta horri begira, herri konpromisoak hartzea bilatuko dute, guztien artean.