Irailaren 26an ziren egitekoak, Igorin eta Akolako mendilerroan barrena, bertako megalitoak ezagutzeko irteera gidatua. Bertan behera geratu zen, ordea, eta biharko jarri dute hitzordu berria: goizeko 09:30etan elkartuko dira Epele auzoan, Irubide jatetxearen ondoko aparkalekuan, lau ordu inguruko irteera egiteko elkarrekin.
«Ibilbidean zehar, Igorin eta Akolako mendilerroa zeharkatu eta kordaleko megalitoak ikusteaz gainera, ezagutuko ditugu Epele errekaren ondoko basoa, landaredia eta fauna, eta gozatu ahal izango dugu inguruko paisaiaz», aurreratu dute.
Irteeran parte hartzeko, hori bai, aldez aurretik eman beharko da izena: donostialdea@behemendi.eus helbide elektronikora idatzi behar da, edo 656 705 243 telefonora deitu.
Beterri-Buruntza ezagutzeko sei irteeretako bat izango da biharkoa, Behemendik antolatuta. Eta Usurbilen egingo dute azkenekoa, datorren igandean, Urdaiaga auzoan barrena.