Pixkanaka ari dira bueltatzen, mendiko zein errepideko lasterketak ere. Oraingoz, proba gutxi batzuk besterik ez dira, baina Urumea bailarako zenbait korrikalarik izan dute aukera, dagoeneko, dortsala berriro jartzeko.
Horietako bat da Hodei Lujanbio goizuetarra. Joan den larunbatean bueltatu zen lehiara, Bizkaian, Atxondoko Sorginen Lasterketan. Eta pandemiaren aurretik bezala, onenen artean ibili zen berriro ere. 9garren postuan sailkatu zen, ia 18 kilometroko ibilbidea 1:45:05 denboran osatuta; Gontzal Murgoitio elorriotarrak, probaren irabazleak, 1:37:52 egin zuen. Lujanbiok aurretik izan zituen asko, Euskal Selekzioko korrikalariak dira.
Josetxo Imaz Memorialean bihar, bost hernaniar eta bi astigartar
Errepideko korrikalariek, berriz, bihar dute aukera Beasainen, Josetxo Imaz Memorialean. Gipuzkoako aurreneko lasterketa izango da, eta Urumea bailarako zazpi korrikalari ariko dira bertan: Antxon Korta eta Gorka Alvarez astigartarrak; eta Ania Arregi, Aitzol Arregi, Alexander Iturralde, Oscar Fernandez eta Ekain Nogueira hernaniarrak.
Goizeko 10:30etan abiatuko dira korrikalariak, Beasaindik, eta 10 kilometroko ibilbidea osatu beharko dute, Lazkaora joanda aurrena, eta Ordiziara ondoren, Beasainera bueltatzeko.