Astelehenean ezarri zuen Eusko Jaurlaritzak osasun larrialdia eta atzo bildu zen Labi batzordea (Larrialdiari Aurre Egiteko Bidea) lehen neurriak zehazteko. Iñigo Urkullu, sailburuak eta diputazioetako ahaldun nagusiak izan ziren bileran. Guztien artean adostu zituzten neurriak aste honetan jarriko dira martxan.
Koronabirusaren agerraldiak EAEn eta Nafarroan izandako gorakada nabarmenari aurre egiteko asmoz ezarri dira neurri murriztaile berriak. Jaurlaritzak eta Nafarroako gobernuak iragarritako neurrien artean, kalean zein leku itxietan gehienez 10 pertsona elkartu ahal izango dira, jarduera edozein dela ere; ez da onartuko hori baino jende kopuru altuagorik elkartzea ez terrazetan, ez parkeetan eta ez kirol jardueretan ere. Taberna edo jatetxeetan, eserita egon beharko dira. Barra zerbitzuan, mahaien artean eta terrazetan 1,5 metroko distantzia bermatu beharko da.
Ostalaritzarekin jarraituz, 01:00etan itxiko dira taberna eta jatetxeak, eta ezingo da bezero berririk onartu 00:00etatik aurrera. Elkarte gastronomikoek eta peñek ere 01:00etarako itxita egon beharko dute. Diskoteka, dantzaleku eta gisakoek itxi egin beharko dute.
Erretzea debekatuta 2 metroko distantzia mantendu ezin bada
Debekatuta dago erretzea bide publikoan edo aire zabaleko espazioetan, pertsonen arteko 2 metroko distantzia mantendu ezin denean. Alkohola edatea ere debekatuta dago kalean, bide publiko, parke edo plazetan.
Adinekoen eta desgaitasunen bat duten pertsonen egoitzetan, gehienez 72 orduko aurrerapenarekin egingo zaie PCRa sarrera berriei, baimen eta oporretatik itzultzen diren langileei eta langile berriei. Bisitei dagokioenez, egoiliar bakoitzeko pertsona bakarra onartuko da (bizitzaren amaieran egonez gero izan ezik), eta bisitak mailakatzea bermatuko da.
Kaleko jardueran, garraio publikoan eta gurtza lekuetan ere, neurri berriak
Federatuak ez diren kirol eta jarduera fisikoak, aire librean, indibidualki edo taldean egin ahal izango dira, kontaktu fisikorik gabe eta eta gehienez 10eko taldeetan. Igerilekuetako edukierak %60ra murriztuko dituzte, eta gehienez ere hiru orduz egon ahal izango da bertan.
Eusko Jaurlaritzak iragarritako beste neurrietako bat garraio publikoaren ingurukoa da. Autobusak, metroak, trena eta bestelakoak, 01:30ean amaituko dira. Gainera, bi orduko bidaiak baino laburragoak direnetan, ezingo da jan. Eta gurtza lekuei dagokioenez, hartutako beste neurrietako bat da beilatoki eta hiletetan gehienez 30 pertsona egon ahalko direla, barruan zein kanpoan izan.