Bukaera ezin ederragoa izan zuen, larunbatean, Zikuñaga Papelera Torneoak. Finalak jokatu zituzten, Hernaniko kiroldegiko frontoian, eta horietan azkenekoa 17na berdinduta zegoela, jokatu zuten azken tantoa: Garikoitz Arizmendi eta Josu Altuna hernaniarrek lortu zuten, txapelak eskuratu eta zaleak pozez lehertzeko. Ezin gehiago eskatu. Hementxe azkeneko tanto horren bideoa:
18-17 hartu zituzten mendean Epleko Taberna eta Mitxelena, partiduari buelta emanda bukaeran. Baina horiek ez ziren izan txapela bakarrak, Urumea bailarako esku pelotarientzat: bederatzi lortu zituzten guztira.
Goizeko aurreneko finalean, Kimetz Ziganda eta Ekhi Oses hernaniarrak nagusitu ziren alebin mailan, Amets Makatzaga eta Manex Alberdi herrikideen kontra (18-6). Julen Deskarga hernaniarra eta Egoitz Elizegi goizuetarra aritu ziren ondoren, kadeteen bigarren mailakoan; baina ezin izan zuten, Oiarpeko Zabaleta eta Aranbururen aurrean (9-18).
Bai, ordea, Anartz Oiartzabal eta Oinatz Insausti hernaniarrek, jubenilen bigarren mailan: 18-12 hartu zituzten mendean, Gure Txeruko Eizagirre eta Olaskoaga. Eta goizeko jaialdia ixteko, gogotik sufritzea tokatu zitzaion, espero bezala, Iñigo Labaka hernaniarrari: 5-18 galdu zuen Eskudero andoaindarrarekin batera, Artetxe lasartearraren eta Irazustabarrena alegiarraren kontra, laugarren tantora aurretik iritsi arren.
Arratsaldekoa, ia borobila
Arratsaldeko jaialdian jokatu ziren beste lau finalak, eta ia borobila izan zen, bailarako pelotarientzat. Infantil mailan, lau t'erdian, Oier Azpeitia nagusitu zitzaion Xuban Iturberi, hernaniarren arteko lehian (18-16).
Kadeteen lehenengo mailan, berriz, eskuak justu xamar izatearen karga nabaritu zuten Jon Jara eta Unai Etxarri hernaniarrek, eta 9-18 galdu zuten, Gaztelekuko Arrillaga eta Belokiren kontra. Baina azkeneko bi finaletan, bailarakoen aldera erori ziren txapelak. Aurrena, nagusi izan ziren Aimar Mujika eta Ekain Lizeaga astigartarrak, jubenilen lehenengo mailan, Oiarpeko Aranburu eta Zalakainen kontra (18-11). Eta ondoren, modurik onenean eman zioten bukaera Arizmendi eta Altuna hernaniarrek, txapelketari.