Martxan, Beterri-Buruntzako Mankomunitatearen prozesua

Eskualde mailako Batzar Nagusia egin zuten astelehenean, Hernaniko Biteri kultur etxean; eta bertan izan ziren Andoain, Astigarraga, Hernani, Lasarte, Urnieta eta Usurbilgo udaletako ordezkariak. Beterri-Buruntzako mankomunitateko estatu­tu­en lehenengo onarpenari, bide eman zioten «aho batez».

Biterin  egindako batzar na­gusian, beste urrats bat eman zen, Beterri-Buruntzako tokiko garapen ekonomiko eta sozialerako mankomunitate baten era­ketan parte hartzeko proze­suan. Horrela, sendotasun juridiko eta administratiboa eskainiko zaio, 2017tik udalen arteko lankidetza-hitzarmen bidez fun­tzionatzen duen egiturari, tokiko garapenaren eta sustapen ekonomiko eta enpleguaren eremuan lanean jarraitzeko. Gai­nera, estatutuetan jasota geldi­tzen da eskualde mailako toki-erakundeak Beterri-Buruntza Mankomunitatea izena izango duela, eta legezko helbidea Hernanin izango duela. «Mankomunitateak funtzionamendu deszentralizatua izango du, baina administrazio-leihatila bana izango du udalerri bakoitzean», azaldu dute. 

Estatutu berriek Mankomunitatearen jarduerak ere islatzen dituzte, Mankomunitatea osatzen duten udalerrien sustapen eta garapen sozioekonomikorako; eta finean, «herritarren ongizatea hobetzeko helburuak lehenesten dira». Beterri-Buruntza eskualde kohesionatuagoa lortzeko egitura ez ezik, helburu konpartituak lortzeko baliabide egokiak izatea ere aintzakotzat hartu zuten.