Partidu garrantzitsua jokatuko du larunbat arratsaldean, Galarretan, Aritz Zubiri goizuetarrak. Galarretaren 50garren urteurreneko txapelketan, semifinalera sailkatu da, Javier Urrizarekin batera; eta finalerako pasea bilatuko du etzi, Ansa II eta Larrañagaren kontra. 15:15etan hasiko da jaialdia, eta bigarren partidua izango da beraiena.
Lau erremontistek, gaur bertan egingo dute semifinalerako pelota aukeraketa, arratsaldeko 18:30etan Galarretan. Eta larunbateko irabazleak, hurrengoan jokatuko du finala, hilaren 18an, Juanenea eta Endikaren kontra.
Joan den asteburuko jaialdirako bezala, semifinalerako ere sarrerak oparituko ditu Kronikak, irakurleen artean, doan. Horretarako, nahikoa da Kronikara deitzea (943 33 08 99), idaztea kronika@kronika.eus helbide elektronikora, edo WhatsApp bitartez harremanetan jartzea, 688 660 714 telefono zenbakira idatzita.