Sagardoak elkartzen gaitu ekimena jarri dute martxan, udarako, Gipuzkoako Sagardogileen Elkarteak, Bertsozale elkarteak eta Musika Bulegoak. Hain justu, sagardotegiek, bertsolaritzak eta musikak egingo dute bat, uztailean eta abuztuan izango diren bost saio berezietan.
Datorren asteazkenean, hilaren 15ean, izango da aurrenekoa, Adunako Aburuza sagardotegian. 20:30etan hasita, bertso afaria egingo dute, Eli Pagola ereñotzuarrarekin eta Unai Mendizabalekin. Aitor Mendiluze ariko da gai-jartzaile lanetan. 40 euro izango dira.
Eta uztaileko beste bi hitzorduak, Astigarragan izango dira. Hilaren 24an, 17:30etan hasita, Astarben egingo dute bertso jaialdia eta afari-merienda, 25 euroan, Maialen Lujanbio hernaniarrarekin eta Agin Laburu astigartarrarekin.
Eta 27an, bertso kata eta afari musikatua izango da, Petritegin, 20:30etan hasita. Bertan ariko dira Aitor Mendiluze eta Iker Zubeldia bertsolariak, eta Imanol Kamio musikari hernaniarra. 40 eurokoa izango da prezioa.
Abuztuko biak, berriz, bailaratik kanpo izango dira. Usurbilgo Saizarren, musika jaialdia eta afaria egingo dute 7an; eta Irungo Olan, bertso afaria izango da 29an, Angel Peñagarikano, Aitor Mendiluze, Sebastian Lizaso eta Andoni Egañarekin.
«Elkarlana balio erantsia da, egungo egoera honetan»
Atzo aurkeztu zuten ekimena, Astarbe sagardotegian, eta bertan izan ziren Olatz Mitxelena, Sagardogileen Elkarteko ordezkaria; Oier Iurramendi, Bertsozale elkartekoa; Aitor Bengoetxea, Musika Bulegoaren lehendakaria; Mikel Arrillaga, HAZIkoa; eta Iker Goiria, Aldundiko turismo saileko ordezkaria.
«Nahi duguna da, herritarrek beste modu batera ezagutzea sagardoaren mundua, udara honetan», azaldu zuen Mitxelenak. Iurramendik eta Bengoetxeak, berriz, garai hauetan bertsolaritzak eta musikagintzak izan dituzten zailtasunak azaleratu zituzten, eta horrelako ekimenen garrantzia nabarmendu: «elkarlana eta elkarren arteko laguntza balio erantsia da, egoera berri honetan. Espero dugu aurrera begira ere elkarlan honek segida izatea», adierazi zuen Bengoetxeak. Arrillagak, bere aldetik, azaldu zuen krisi honek jendea bultzatu duela «bertako produktua kontsumitzera», baina «lan asko» dagoela egiteko oraindik. Eta Goiriak adierazi zuen, ekimenak «sagardogintzarekin daukagun altxorra nabarmentzeaz gain, euskal kulturari balioa» ematen diola.
Beste hainbat plan ere aukeran, sagardoarekin lotuta
Baina bost ekintza horiek bakarrik ez, beste hainbat proposamen ere luzatu dituzte, sagardoarekin lotuta. Bodega planek, batetik, bisita gidatu ezberdinak egiteko aukera ematen dute. Familia planek, bestalde, Gipuzkoako hainbat txoko ezagutzea ahalbidetzen dute, Agorregiko burdinola, Iturrarango erlauntza, Larraondoko zerrategia eta Aizpea meategia, esaterako; eta bisita horien ondoren, sagardotegian otordua egitea. Plan gastronomikoak ere badaude, sagardoa uztartzeko gaztarekin, txakolinarekin eta baserritarren azokekin. Kirol planek, aldiz, kanoan edo arraunean aritu eta sagardotegian otordua egitea proposatzen dute. Eta plan kulturalek, itsasora eta mendira hurbilduko dituzte bisitariak, sagardoarekin lotura eginez.
Eta azkenik, landa eremuan asteburupasak egiteko aukera ere eskaini dute, landetxea, nekazal etxea edo xarmadun hotela duten zortzi sagardotegitan.
Ekintzetarako erreserbak egin eta sagardoa erosteko aukera, 'sagardoa.eus' web orrian
Uztailerako eta abuzturako antolatu dituzten bost saio berezietarako, dagoeneko egin daitezke erreserbak, bertsosarrerak.eus eta sagardoa.eus webguneetan. Eta gainerako planak erreserbatzeko, sagardoa.eus web orrian bertan izango da aukera. Zuzenean egin daitezke erreserbak, eta bilaketak egitea ere erraztu nahi izan dute: menuaren arabera, familian joateko egokienak, herriaren arabera... Sagardoa ere erosi daiteke bertan, eta 44 sagardo ezberdin daude aukeran. Eskaera egin, eta etxera eramaten dute.