Gailu mugikorretarako aplikazioa sortu du Udalbiltzak, Euskal Herrian barne turismoa sustatzeko asmoz: Lurgida izeneko aplikazioan bildu dituzte zonalde bakoitzeko interesguneak, eta horietako hainbat markatu dituzte Urumea bailaran ere.
Asteazkenean aurkeztu zuten, Andoaingo Martin Ugalde kultur parkean, Jabi Asurmendi Udalbiltzako lehendakariak eta Lamia Arcas batzorde eragileko kideak. «Euskal Herriko ondare inmateriala eta ibilbide tematikoak proposatu ditugu Lurgidan, eta furgoneta eta autokarabanei ongietorria egiten dieten etxaldeak bildu ditugu».
Euskal Herria «beste modu batera» ezagutzeko parada, aplikazioaren bitartez
Gailu mugikorretarako dago eskuragarri, Android eta iOS sistema operatiboa dutenentzat. Eta webgunean ere erabili daiteke: www.lurgida.eus. Lau hizkuntzatan dago erabilgarri: euskera, gaztelera, frantsesa eta ingelesa.
«Euskal Herria beste modu batera ezagutzeko parada eman nahi diegu aplikazio honekin, bertako zein kanpoko bisitariei», azaldu dute. «Bultzatu nahi dugu turismo jasangarriagoa eta lurraldearekiko errespetuan oinarritutakoa; eta bide batez, tokiko ekonomiarentzat onuragarria izango dena». Horretarako, bildu dituzte ondare inmateriala eta historia zeharkatzen dituzten hamaika ibilaldi, eta ehunka udalerriren informazioa, interesgune, historia, ohitura edota jaien berri emanez. Furgoneta eta autokarabanei ere egin diete txoko berezia: «Europa mailan hain errotuta dagoen praktika horren bidez, bisitariek gaua bertan pasatzeko aukera dute, eta era berean, baserritarrek haien ekoizpenak ezagutarazi ditzakete. Horrela, KM0 kontsumoa sustatu nahi dugu, lehen sektorearekiko sentsibilizazioa eta ezagutza areagotuz».
Urumea bailara, interesgune
Lurgidan jasotako interesguneetatik zenbait, Urumea bailaran bertan daude. Horrela, Goizueta, Hernani eta Astigarragari buruzko informazioa jasotzen du aplikazioak, eta baita ibilbideak zein toki interesgarriak aipatu ere: Domiña baserria, Sagardoetxea, Sagar Trekking ibilbidea Santiomendiko Sagardo Bidean, eta Galarreta frontoia.