Bob Barckley RAFeko ofiziala hil berri da, 99 urtekin. 1943 urtean bere hegazkina lurrera bota zuten naziek, Frantzia eta Belgikaren arteko mugan. Comete sare klandestinoak lagunduta, ihes egin zuen Belgika eta Frantzian zehar, Ipar Euskal Herrirantz. Eta Urruñatik Oiartzunera bidean, muga igarotzen, Florentino Goikoetxea Beobide mugalari hernaniar ospetsuak, Altzueta baserriko semeak, gidatu zuen ihesean.
1942an, Londreseko hegoaldeko Kent mendialde gainean patruilatuz, Barckleyk eta bere hegazkin-eskuadroiak zibilak babestu zituzten, V1 misiletatik. Suziri-misil hauek hegazkinetatik botatzen zituzten alemaniarrek, Londres gainera. 680 kilometro orduko abiaduran, hiru minutu besterik ez zuten behar misil hauek Londresera iristeko, eta misil bakoitzak, batezbeste, 35 zibil hil zituen.
Bigarren Mundu Gerran, Bob Barckleyk Luftwaffearen hamabi bonba hegalari suntsitu zituen. Baina horietako bat berezia eta ospetsua izan zen. Bere hegazkinaren hegalaren gaineko aire-fluxua baliatu nahi izan zuen, V1 misila desbideratzeko.
Hala egin zuen, baina V1eko giroskopioek berriro programatutako ibilbidea berrabiarazi zuten. Eta beste aukerarik ezean, Barckleyk hegazkinaren hegala sartu zuen misilaren, V1 misila lurrera bota zuen.
Mendiz mendi etorri zen Bob Barckley, muga zeharkatzeko, beste hainbat abiadore bezala. Horietako bat izan zen George Duffe, mugalariei Loidin egiten dieten omenaldira etorri izan dena Hernanira. Eta hark ondo gogoan zuen Florentino Goikoetxea, eta garai haietan bizitakoa, makina bat urte pasa arren. Gauez eta euritan iritsi ziren Euskal Herrira, ihesi zijoazen lau abiadore, «elkarri helduta, ez galtzeko». Aurretik zuten Goikoetxea mugalari hernaniarra.
Comete Sarea, Bigarren Mundu Gerran pilotu aliatuen salbokonduktua
Florentino Goikoetxea Comete Sareko pieza garrantzitsuenetakoa izan zen. Bigarren Mundu Gerran Alemaniak okupatuta zituen eremuetan eroritako pilotu aliatuak, berriro etxera itzultzen zituen sarea zen Comete. Sare horretan parte hartu zutenek, pilotuak jaso eta, bide desberdinetatik, Ipar Euskal Herrira gidatzen zituzten.
Ondoren, hemengo gidarien laguntzarekin, Bidasoa zeharkatu eta Oiartzunera hurbiltzen zituzten. Mugalari eta laguntzaile horietatik bat nabarmendu zen, Hernaniko Florentino Goikoetxea.
Florentino, gauez argi
Abiadoreek, Florentinoren lana eta bere izaera deskibratu izan dute Hernanira, Loidira, etorri izan direnean, omenaldia jasotzera eta eskaintzera. Horietako bat Bob Frost izan zen, 2014an. Urte hartan deskribatu zuen, nola zeharkatu zuten muga, berak eta beste hiruk, Goikoetxearen atzetik: «14 ordu egin genituen mendian, gauez, euritan, eta Florentinok ederki zekien nora jo; pattar botilen bat gordeta utzia zuen zuhaitza ere topatu zuen gau hartan». Ihesaldian lagundu zioten guztiei eskerrak eman zizkien, eta bereziki Goikoetxea izan zuen gogoan, «gizon haundia inondik inora».
Joan den urteko martxoan hil zen Bob Frost, 95 urterekin.
Guardia Zibilarekin topo ez egiteko, eremu garaiak
Ihesaldietan, bailara eta auzoetatik aldenduz, eremu garaiak erabiltzen zituzten, horrela Guardia Zibilarekin eta erregimen frankistaren laguntzaileekin topo egiteko aukera murrizten baitzuten.
2014ko bisita hartan, Frostek berak kontatzen zuen gertatu zitzaiona, Florentino Hernanira gidatzen ari zitzaiola: «bideko zulo sakon batean erori nintzen, eta berehala, esku haundi batzuek eutsi eta untxi txiki bat izango banintz bezala zulotik atera ninduten».
Euskal Herritik, Madrilera joaten ziren eta han Britania Handiko enbaxadara joan, eta segurtasun haundiagoko herrialdetara egiten zuten ihes.