Aurreko asteburuan Zarautzen bezala, onenekin izan zen herenegun berriro Ibon Miner ereñotzuarra, Legazpin. Lehendakari Txapelketako hirugarren tiraldia zuten, eta 44 brila bota zituen Minerrek, eguneko onenak baino hiru gutxiago: 47 lortu zituen Zeraingo Patxi Arrondok. Ategorrietako Mikel Lazkano izan zen bigarren (46), eta Zeraingo Itoiz Alustiza hirugarren (45). Urrutiago geratu ziren Miguel Arrozpide hernaniarra eta Leandro Miner ereñotzuarra, 29na brilarekin.
Rosa Santos astigartarra ere ondo aritu zen, hirugarrenarekin berdinduta. 31 brila bota zituen berak, Goreti Beloki zarauztarrak bezala; eta Bea Unzue (37) eta Aitziber Ugalde (33) billabonarrak izan zituzten aurretik. Martxeli Kanflanka ereñotzuarrak, berriz, 22 brila lortu zituen.
Toka tiraldirik ere izan zen Legazpin, baina horretan okerxeago moldatu ziren Urumea bailarako tiralariak. Antonio Amundarain eta Karlos Irastorza izan ziren onenak, 16na joaldirekin; eta 14 lortu zituen Jose Mari Iñurrategik. Ibon Miner izan zen hemengoen artean onena berriro, 11 aldiz jota; zazpi aldiz jo zuen Leandro Minerrek; eta behin Martxeli Kanflankak.
Hurrengo bola tiraldia, datorren igandean izango dute, gertuago, Urnietan. Lehendakari Txapelketako laugarrena da.