Pasa da Martxoaren 8a, Emakume Langilearen Nazioarteko Eguna. Baina genero berdintasuna lortzeko zereginik ez da falta. Hala erakutsi dute jendetza bildu duten Hernaniko manifestazioak edota Astigarragako diana indartsuak. Berdin, Ereñotzun izan diren hitzaldi eta kontzertuetan parte hartu duten herritarrek, edota Aranon afaritan eta emanaldian, eta Goizuetan emanaldi, lilatoi eta bazkaritan elkartu diren herritarrek.
Oraindik egiteko lan asko dago, ordea, eta horren adierazgarri, hainbat ekitaldi hilabete osoan zehar luzatuko dira.
Pelikula feminista gaur, Astigarragan
Hasteko, Harituzek antolatuta, Talentos ocultos film feminista ikusi ahal izango da gaur, 17:00etan Astigarragako kultur etxean, eta solasaldia izango da gero.
Bestalde, HAPOrako hirigintza genero ikuspegitik diseinatzeko bilera irekiak egingo dira emakumeekin, bihar, hilaren 18an eta 25ean, 17:30etan kultur etxean.
Emanaldiei dagokienez, hilaren 15ean Irradaka dantzatuko dute emakumeek Foru plazan 13:00ean; Mari eta gaileta fabrika antezlana izango da publiko guztientzat egun berean 17:00etan, kultur etxean, eta Alu Ulu, sexualitateari buruzko monologoa hilaren 26an, 18:00etan.
Emakumeon Plazarako horma irudia osatzeko argazki tailerretarako, berriz, dozenaka emakumek eman dute izena.
Azkenik, Udalak gogorarazi du hileko larunbatero Puntu Morea jarriko dela Joseba Barandiaran plazan, 19:00etatik 20:00etara, indarkeria sexistari buruzko informazioa zabaldu eta babesa emateko.
Pelikulak aukeran, Hernanin
Zine Foruma izango da Hernanin Berdintasun Kontseiluak eta Udalak antolatuta egingo den hurrengo ekitaldia. Hilaren 13an izango da, Biterin, 19:00etan: Una mujer en llamas ikusi ahal izango da.
Era berean, hilaren 27an Zinegoak, Gaylesbotrans 17. Naziorteko Zinema eta Arte Eszenikoen Jaialdiko film laburrak ikusi ahal izango dira Biterin, baita ere, 19:00etan.
Erakusketa parte-hartzailean, emakumea ardatz
Urumea bailararen Nafarroako aldean ere, emakumeari protagonismoa emango zaio oraindik ere hilabetea bukatu arte, behinik behin; irekita jarraitzen baitu Zer da zuretzat emakumea? erakusketa parte-hartzailerako proposamenak bidaltzeko epeak. Leitzaldeko eta Goizuetako mugimendu feministak antolatu du, eta helburua da galdera horri erantzutea, edozein motako lanak sortuz: bertsoak, ilustrazioak, poesiak, argazkiak, collageak...
Proposamenak martxoaren 16ra arte egin daitezke Goizueako estankoan edo kafetegian, edo sastrakak@gmail.com helbidean
Erakusketa, Goizuetan, hilaren 23tik 29ra jarriko da, labaderoan. Leitzan, gero, Atekabeltzen, apirilaren 5era arte.
Bertsotan, emakumeei
Emakume Langileen Nazioarteko Eguna ospatu dute Epeleko Poxpolinek ere, eta bertsotan egin zieten gonbidapena gainontzekoei, egunarekin bat egin eta ospakizunekin gozatzeko:
Emakume eguna
iritxi da antza
Epeleko poxpolin
hauek a ze martxa.
Hirubitan bazkalduz
xaltxa eta txantxa
nahiz eta gero etxeratu
bilintzi balantza.
Egun ederra pasa
ez egin zalantza.
Asko izan dira Martxoaren 8a, Emakume Langileen Nazioarteko Egunaren harira aldarrikapenak egin eta ospakizun egunarekin bat egiteko deia zabaldu duten talde eta eragileak, Urumea bailaran. Kirolariek ere aprobetxatu dute, alor guztietan indar egiteko beharra dagoela gogorarazteko eta emakumeak zoriontzeko. Halaxe egin zuten Mundarroko hainbat kirol taldek, eta baita Hernaniko boleibol taldeak ere.
«Genero zapalkuntzari aurre egiteko mekanismoak sortzeko hautuari eutsi, eta, beste behin, ikasleria langileak konpromezuz erantzun dio betebehar honi», azaldu du Hernaniko Ikasle Abertzaleakek. Berdintasunaren alde, tailerrak eta elkarretaratzea egin zituzten institutuan.
Aste osoko egitaraua hasteko, Katiluzar guraso elkarteak antolatuta, seme-alaben sexu heziketaren inguruko hitzaldia izan zen, eta brotxe moreak egin zituzten umeekin. Olak auzo elkarteak, berriz, Amak taldea ekarri zuen igandean.Kistiñe Solano ereñotzuarra, Alaitz Telletxea, Maixa Lizarribar eta Ixiar Oreja kideekin aritu zen, txoko askotako pandero ikasleek lagunduta.
Goizetik hasi zuten Emakume Langilearen Nazioarteko Eguna, Goizuetan. Zer eta, korrika, gainera. Lilatoia, oraingoan, mistoa, egin zuten herrian barrena, eta indarrak berreskuratzeko bazkaritarako elkartu ziren, emakumeak bakarrik, Oxeguardan. Giro eta umore ederrean bildu zituzten indarrak, eta arratsaldea borobiltzeko trikitixaren erritmora ibili ziren kalejiran, Plazatik abiatuta, herrian barrena.
Herriko zubi nagusia morez jantzi zuten igandean goizuetarrek. Lilatoiarekin hasi zuten eguna, eta korrika saioan hartu zuten parte adin guztietako herritarrek, zapi eta bandera moreak airera zabalduta, genero berdintasunaren aldeko bidean pausoak emanez.
Emakumeen Eguna diana zaratatsuarekin hasi zuten Astigarragan. Joseba Barandiaran plazatik abiatuta, herrian buelta egin zuten, jendea esnarazi eta aldarrikapenekin bat egitera animatzeko. Eguerdiko tailer eta manifestu irakurraldiaren ondoren, Donostian egin zuten bat.
Ordularia martxan jarri zuten Martxoaren 8an, Hernanin. Matxismoaren azken minutuak zenbatu zituzten Tilosetako agerraldian, eguerdiko manifestazio jendetsua bukatu berritan. Adin, jatorri eta maila sozial guztietako emakumeak ordezkatu zituzten, eta denen eskubideen aldeko aldarria egin zuten, matxismoaren azken minutuak zenbatzen zituen ordularia puskatzen zutela. Bazkaria egin zuten gero, Atsegindegin. Bestalde, agerraldian gogoan izan zituzten Osiñagan ezbeharra izandakoak, eta senide eta lagunak.
