Bolada onari segida eman dio Hodei Lujanbio goizuetarrak, asteburu honetan, mendi lasterketen denboraldian. UZ Trailen aritu zen, Urretxu eta Zumarragako 23 kilometroko proban, eta bigarren sailkatu zen (2:03:53), Iñaki Olano altzotarraren atzetik (2:01:41).
Aiako Mendi Lasterketan ere aritu ziren bailarako korrikalariak (14,6 kilometro); 12 guztira. Nesketan, bosgarren izan zen Koro Astiz hernaniarra (1:31:32), eta bederatzigarren Itsaso Martinez astigartarra (1:40:14). Mutiletan, Anartz Mendizuri izan zen aurreneko hernaniarra (1:27:54), eta David Trallero lehenengo astigartarra (1:28:54).
Lilatoian, bailarako 205 lagun
Errepidean, berriz, proba seinalatua zuten igandean, Donostiako Lilatoiarekin. Bailarako 205 emakumek hartu zuten parte, eta Aitziber Martin (19:01) eta Hoki Guerrero (19:10) hernaniarrak izan ziren haietatik azkarrenak, laugarren eta bosgarren. Bailarakoen sailkapen osoa, larunbateko Kronikan.