Hondatu da makineria zaharra. Heldu da aldatzeko garaia.
Bizi dugun krisi sistematikoak zerbaitetarako balio badu, izan da egun dugun paradigma ekonomikoa birplanteatzeko -edo, behintzat, honen inguruan eztabaidatzeko-. Birpentsatze horretan, asko dira gure lurraldean sortu diren, ari diren eta sortzear dauden ekimenak. Makina berri bat taxutzeko piezen bila dabiltzanak.
Proiektu eraldatzaile guzti horien artean zubiak eraikitzeko -bakarrik ez baigoaz inora- eta kontsumo arduratsurako alternatibak ikusarazteko, duela urte gutxi batzuk sortu zen Batura. Elkarteak mapa interaktibo bat du sarean, tokiko garapenean sakonduz gailu berritzaile honen eraikuntzan dabiltzan ekintzaile eta eragile desberdinen erakusleiho dena.
Greba orokorrak azaleratu zuen: Euskal Herria eraldaketarako gogotsu dago. Eta hortan dabil. Eredu zaharkitua behetik gora asaldatzen. Engranaje berriak artikulatzen. Elkarrekin, gizarte eta ekonomia eredu iraunkor eta justu bat antolatu eta babesten.
Maialen Mangas Urkizu
Batura
Euskal herriko ekonomia sozial eta eraldatzailearen mapa