Batzuen alaitasuna besteek jasota, dantzan segiko du Urumea bailarak, gaur eta bihar ere, Inauteriekin. Izan ere, atzokoan bukaera polita eman bazieten astigartarrek, Iñude eta Artzainen konpartsak piztutako giro ederrarekin, egun potoloa dute gaurkoa, oraindik ere, goizuetarrek eta hernaniarrek.
Atzo hasi ziren Inauteriak Goizuetan, gaztetxoen Zahagi Dantzarekin. Eta batek baino gehiagok, ondo garbitu beharko du aurpegia, gaurko konpartsarako prestatzeko. Izan ere, ez ziren bereziki goxoak izan, zahagiek banatu zituzten muxu beltzak... Zirkuak hartuko ditu Goizuetako kaleak gaur, horixe jarri baitute konpartsarako gaia, aurtengoan.
Hernanin, berriz, atzo atera ziren konpartsak kalera, eta haiekin batera, baita animalia pila bat ere. Oihanera egin zuen salto Hernanik, makina bat zebra, lehoi, elefante, krokodilo, jirafa zein tigre ibili baitziren, kalez kale. Axeri Dantzak, erraldoi eta buruhaundiek, musikak eta jolasek hartuko diete erreleboa, gaur.
INAUTERIAK GAUR
HERNANIN
09:00, Diana, Hernaniko Soinua elkartearen eskutik.
10:00, Axeri Dantza gaztetxoentzat.
11:30, Haurrentzako poniak eta zezen txikiak, Latsunbeberrin.
12:00, Kulki haur jolasak, Atsegindegin.
16:00, Erraldoi eta buruhaundiak, Hernaniko Soinua taldeko dultzaineroekin.
17:00, Gaztetxoentzako puzgarriak, Atsegindegin (8 urtetik gora).
GOIZUETAN
08:00, Mozorroen irteera baserrietara.
10:00, Plazaren apainketa.
11:30, Hamaiketakoa.
12:00, Konpartsa herrian zehar.
13:30, Haurren bazkaria.
14:00-16:00, Haurrentzako tailerrak.
14:30, Helduen bazkaria.
18:00, Txokolatada.
18:00, Gorka eta Garazi trikitilariak.
Iluntzean, Mozorroen etorrera dultzaineroekin.
22:00, Mozorroen afaria.
